Иә, Елбасы Нұрсұлтан Назарбаев айтқандай, осындай шақта бәріміздің ойымыз бір нүктеде тоғысуы керек. Неге? Себебі бірлік бар жерде тірлік боларын қазақ жақсы біледі. Шынында мұндай кезеңде салмақ тек медицина саласының мамандарына түспеуі керек. Өйткені әлемде, елдегі болып жатқан жағдай жұдырықтай жұмылып іс қылуды талап етеді.

Тұңғыш Президент өз мақаласында жас ұрпаққа келелі кеңес айтып, сенім білдірді. Тәуелсіздік жылдары дүниеге келген бізді еліміздегі ең қуатты күшке теңеді. Ал осы сенім үдесінен шығу – сіз бен бізге міндет. Расында аға буын біздің кемел келешегіміз үшін қолдан келген көмегін аямады. Енді тәуелсіз мемлекетімізге қызмет ететін уақыт жетті. Бізге, жастарға жамандықтан, жат әдеттен сақтанып, игі істерге ұмтылу қажет. Үлкенге ізетті, кішіге қамқор, бір-бірімізге дос болу сияқты жақсы қасиеттер бойымызда көп әрине. Бірақ алдағы уақытта қандай қиын кезеңге тап болсақ та осы жақсы қасиеттерімізді бойымыздан жоғалтып алмауымыз керек.

Қазір елдегі жағдайға біз де алаңдаймыз. Бірақ бұл қиындықтан өтерімізге сеніміміз мол. Егемен елдің еңсесін одан әрі тіктеуге біз өз үлесімізді қосуға тырысамыз. Себебі мемлекет бізге сенім артып отыр.