Жергілікті шаруашылықтардың күзгі науқан жұмыстарына кіріскеніне де айға жуық уақыт болды. Өнімнің шығымы жаман емес, енді дала дарабоздарының алдында оны ысырап қылмай, қамбаға құйып алу міндеті тұр. Бұл тұрғыда да еңбеккерлер шаруасын ширатты. Мақпалкөл ауылындағы “Ер-Әлі” шаруа қожалығының да қазіргі таңда күзгі науқанды бастап кеткеніне біршама уақыт болды. Бұл шаруашылықтың бір ерекшелігі биыл күріштің бірнеше сұрпын егіп, оны нарыққа шығаруға талаптанып отыр.

Қазіргі таңда шаруашылық төрағасы Әліби Бек­жанов көктемде сепкен “Лидер” сұрпынан басқасын қамбаға құйып алды. Күріштің аталған сұрпына ен­ді орақ салып жатыр. Салада өзіндік қол­таң­басын қалдырған тәжірибелі тө­ра­ға әрбір себілген дәнді уақытында жинап алу өнім сапасына оң әсерін тигізетінін айтады. Оның үстіне ауыл жанашырының себілген дәннің толық пісіп-жетілуін кү­тіп, арқаны кеңге жаятындай реті бар. Се­бебі шаруашылық төр­аға­сы барлық техникасын 100 пайызға жаңартып алған. Ертеңгі күні ала жаздай баптаған өнім жауын-ша­шынға ысырап болады деген көкейінде күдік жоқ.

Енді науқанның негізгі жұ­мыстары ме­ханизаторларға тікелей бай­­ланысты. Ша­руа­­­шылық құрылған жы­лы олардың көне көлік­тер­мен талай қиын­шылықты көргенін халық қалау­лы­­сының өзі де жақсы біледі. Бірақ ымы­рамен, ауыз­біршілікпен бір қолдың са­ла­сындай іс қылудың нәтижесінде ол күндер артта қалды. Әлекең өзі құрған шаруашылықтың шаруасы ширағалы бі­рінші кезекте техника базасын жаңа­лау­ға басымдық берді. Бүгінде сол ісінің нәтижесін көріп отыр.

“Ер-Әлі” шаруа қожалығының бір жа­ғы­нан тұқым дайындап, оны нарыққа шығарумен айналысып жат­қанына да біршама уақыт болды. Төраға бұл жұ­мыс­тарды қолға алысымен Мақ­пал­көл­­де дайын­дал­ған Сыр салысының сұр­­пына сұраныстың арт­қаны мұндағы өнімнің сапасы жоғары болатынын аң­ғартып тұрғандай. Тіпті биыл көктемде аймақтағы тұ­қым дайындайтын ірі ша­руа­шылықтардан да кү­ріш­тің бірнеше сұрпын артығымен нарыққа шығарған.

Көрсең, көз сүйсінеді, баяғыда меха­низа­тор­лардың көп уақыты көліктің ішін­де емес, техниканың астында өте­тін. Қай атызға барсаң да ақауы көп техникалар шаруашылық жұмысын арт­қа тартатын еді. Қазір ше, қазір бұл қиын­шылықтардың барлығы артта қал­ды. Оның үстіне Әліби Бекжанов шаруа­шы­лық ұжымының барлығына жағдай жасап қойған. Нәтижесін бүгінде көріп отыр, еңбек өнімділігі жылдан-жылға ар­тып келеді, дала дарабоздары да бұ­рын­ғыдай артық бейнет жасамайды, бар­лығын техника атқарып отыр десек, артық айтқандық болмас. Міне, төраға ең­беккерлердің әлеуметтік жағдайынан бөлек жұмысының ширауына да бар мүмкіндік жасап қойса, мұның үлкен көмек екенін еңбек адамдары сезінсе, “Ер-Әлінің” әлі талай асуды алары анық.

Биыл шаруашылықтың егіс алқа­бын­­дағы өнімнің шығымы жаман емес. Жыл сайын межелі өнімнен артық астық ала­тындай Әлекеңнің реті бар. Өйткені ауыл жанашыры бірінші кезекте себілген тұқымның еш кедергісіз бас алуы үшін және оның пісіп-жетілуінде жерді күтіп-баптаудың маңызы жоғары екенін жақ­сы біледі. Әр жылдың маусымдық жұ­мыс­тарында ротацияның сақталуына ба­сым­дық беріп, тұқым себілетін алқаптың бір кел­кілігін реттеп отыратыны да сон­дық­тан.

“Ер-Әлі” шаруа қожалығының төра­ға­сы “Елде болса, ерінге тиеді” деген қанатты сөзді қаперден шығарған емес. Әр жылдары қайырымдылық ша­ра­­ларынан шет қалмай ауылдың да абаттануына, халқының тұрмыс сапа­сы­ның артуына өз үлесін қосып келеді. Басылымның өткен сандарының бірінде Әлекеңнің “Қуанса, бала қуансын” деген қанатты сөзді қаперге алып, 10 млн теңгеден астам жобаны туған жерінде жүзеге асырғанын айтқан едік. Қазіргі таңда Мақпалкөлдегі балалар ойын алаңының ауыл жастары игілігін көріп отыр. Мұнан бөлек осы өңірдегі 10 отбасына жеке қаражаты есебінен баспана салдырып жатыр. Қазір олардың алды өз үйлеріне кіріп, қоныс тойын тойлап үлгерді. Ал біршамасының құрылысы қарқын алған. Ауылдың әлеуе­тін арттыруда Әлекеңнің қолға алған жобаларының бұл басы ғана. Туған жерді түлету мақсатында оның ойында жүрген жоспары көп. Бастысы солардың бастамасының өзі жемісін беріп жатыр. Ләйім жалғасы да солай болғай.

Төрағамен тілдессең, шаруаның емес, тура бір руханият жанашыры іспетті. Әрбір сөзінде тәлім, тағылым бар. Ал құр сөздің адамы дейін десең, бұл ойыңды оның осыған дейін ауылдың абаттануы жолында қолға алған жобалары жоққа шығарады. Қысқасы жан-жақты адам екенін ісімен де, сөзімен де дәлелдеген азамат екенін түсіндік. “Бос уақытты жек көремін” дейді Әлекең. Яғни адамның бос уақыты болса, ол адам міндетті түрде бір жамандыққа ұрынары анық. Мұны Абай атамыз да жоққа шығармайды. Міне, үлкеннің сөзін де, өзін де ұлағат деп білген азаматтар ғана ұлы істерді тындырса керек. Шаруашылықтың жұмы­сына береке берсін.