"Жаңаарықтың" шаруасы ширақ
Биыл Аламесек ауылдық округіндегі “Жаңаарық” шаруа қожалығы көктемгі науқанды мамыр айында бастаған болатын. Себебі төраға Ғалымжан Қайырманов заманауи техникамен алдымен Сыр салысы себілетін егіс алқаптарын тегістеп алуды жөн деп тапқан. Оның үстіне бұрынғыдай техникалық базасында көне көлік көзге түспеді. Шаруашылық төрағасының да “Жаздай баптаған астық жауын-шашынға қалып қояды-ау” деген көкейінде күдік жоқ. Себебі мұндағы еңбек адамдары тізгіндеген көліктердің барлығы озық технологиялар.Осыдан 18 жыл бұрын құрылған шаруашылықтың тарихымен жақсы таныспыз. Рас, бастапқыда шаруаның ширауына көне көліктер ырық бермеді. Десе де ымырамен іс қылған Қайырмановтар әулеті мұндай қиыншылықтың барлығына адал еңбекпен төтеп берді. Нәтижесін кеше атыз басына барғанда байқадық. Осыдан 20 жылдай уақыт бұрын 90 гектар жермен жұмысын бастаған шаруашылықтың бүгінде егіс алқабында да айтарлықтай өсім бар.
Биыл шаруашылық ұжымы 100 гектардан астам жерге “Лидер” сұрпын сепкен. Бүгінде бас ала бастаған Сырдың басты дақылының да пісетін күні таяп қалды. Ала жаздай атыз басында диқандар күріштің күтімін жасаса, шаруашылық базасында механизаторлар техникасын сайлап жатыр.
15 адамды жұмыспен қамтып отырған Ғалымжан Қайырманов биыл да үлкен өнімнен үмітті екенін жасырмады. Себебі ол диқандар Сыр салысының ала жаздай бабын жасаса, Жер-Ана жерге қаратпайтынына сенеді. Төрағаның артқан сеніміне де бұған дейін сызат түспеген. Себебі Ғалымжан Жарылқасынұлы әріптестеріне жыл сайын жалақысынан бөлек қосымша сыйақы тағайындауды дәстүрге айналдырыпты.
– Былтыр күзгі науқанды межелі өніммен қорытындыладық. Биыл да үлкен өнімнен үміттіміз. Шаруашылық жұмысшыларының дәнді сепкеннен оның жинап алғанға дейінгі еңбегін жоғары бағалаймын. Сондықтан оларға жыл сайын жалақысынан бөлек қосымша сыйақы тағайындаймын. Мәселен, былтыр салада өзінің қарымды жұмысымен көзге түскен қос механизаторға 2 жеңіл автокөлік сыйға тарттық. Мұнан бөлек биыл 5 жаңа мотоцикл алып бердік. Еңбеккерлерге жағдай жасалмаса, шаруашылықтың да жұмысы шатқаяқтары анық. Сондықтан олардың әлеуметтік жағдайына да көңіл бөліп тұрамыз, – дейді Ғ.Жарылқасынұлы.
Қазіргі таңда алқаптағы 100 гектардан астам күріштің 5 диқан күтімін жасайды. Ал күз мезгілінің алғашқы айында өнімді межелі уақытта қамбаға кіргізу үшін 5 механизатор күндіз-түні еңбек етеді. Қазірдің өзінде алқап басында бос жүрген жан көрмейсіз. Қолы қалт етсе, диқан иығына кетпенін асынып атыз жағалайды. Өйтпесе бола ма, күріш тегіс су ішпесе, мұның өнім сапасына да айтарлықтай кері әсері болады екен. Сондықтан мейлінше оның еш кедергісіз өсуі үшін дала дарабоздары бар жағдайды жасап отыр. Бұйыртса, су тартатын уақыт та болып қалды. Күз кірісімен мұнда механизаторлар да өз жұмысына кіріседі.
“Жаңаарық” шаруа қожалығы былтыр себілген Сыр салысының әр гектарынан орташа есеппен 67 центнерден өнім жиған. Биыл су тапшылығының құрсауына қарамастан мұндағы еңбек адамдары нәтижелі жұмыс жасады. Соның арқасында қазіргі таңда алқаптағы күріш тегіс бас алып тұр. Бұл мәселе қолбайлау болғанын төраға да жасырмады. Десе де, амалын тауып, сусорғыш аппараттар арқылы бұл мәселені де ауыздықтаған көрінеді.“Жаңаарық” шаруа қожалығының ұжымы 100 гектардан астам күріштен бөлек 30 гектар ескі жоңышқаның да күтіміне жауапты. Мұнда ротацияның, яғни ауыл шаруашылығы мақсатындағы жерді пайдаланудың талаптары сақталғанын бірден байқауға болады. Біз барғанда шаруашылық ұжымы жоңышқаның үшінші орымын бастап жатыр екен. Бұйыртса, қыркүйектің аяғында Ғалымжан Қайырманов жоңышқаға төртінші мәрте орақ салуға бел буып отыр. Бастысы жұмыста береке, ұжымда ауызбіршілік бар. Бұл екеуі тоғысқан тұста шаруашылықтың ұзақ жылдар бойы шаруасы шатқаяқтамасы анық.
Кенжетай ҚАЙРАҚБАЕВ
