Қанша жылдық тарихы бар қазақ даласында күні бүгінге дейін небір дәуір өтті. Тарихтан ойып орын алған, халықты титықтатқан қанды оқиғалардан бөлек, елдің дамуына, болашаққа үмітпен қарауына сеп болған маңызды қадамдар да ел жадында. Бұл сөзімізге әріге бармай-ақ кешегі ел азаттыққа қол жеткізген күннен бергі жаңалықтар дәлел бола алады. Өйткені “тәуелсіздік” атты қымбат құндылық қазақ аспанында салтанат құрғалы халық ең бастысы еркіндікті сезінді, өз бетінше күн кешудің, ешкімге жалтақтамай өз жерінде, өз топырағында аяғын нық басудың баға жетпесін түсінді.

Қазақ – тәуелсіз халық. Қазақ тек ер­кін­дікте өмір сүруі керек дедік. Тарихи дүм­пулерге қарсы тұрып, намысты қолдан бер­меген ба­тыр бабаларымыздың да жүрек түк­пірінде жаң­ғырған бір ғана мақсаты бол­ды ол да – азаттық. Енді міне, талай кезеңді артқа тастап, сол армандаған азаттықтың ақ таңы атқалы отыз жыл. Отыз жылда бәрін жаңадан бастаған жас мемлекетіміз көштен қалмауға тырысты. Әйтеуір тілімізді, ділімізді, дінімізді жоғалтып алмадық. Ке­зін­дегі хандардың ізін жалғаған бүгінгі Ел­басымыз, Президентіміз өз ке­зеңдерінде Қазақстанның әлемге таны­луына, әсіресе елдің сапалы тұрмысқа қол жеткізуіне күш жұмсады.

Бүгінгі Мемлекет басшысы Қасым-Жомарт Тоқаев та саяси құжатта тәуел­сіз­дік баға жетпес құндылық екенін, осы жол­да қанша тер төгілгенін және елдің Тұңғыш Пре­зидентінің сарабдал саясатының арқа­сын­да Қазақстан осы уақыт ішінде көптеген жетістікке жеткенін толғана айтқан болатын. Осы егемендік дегеніміз жәй ғана жалаң ұран мен жалынды сөз емес екенін қадап айтқан Қасым-Жомарт Кемелұлы оның қым­бат құндылық екенін тағы бір тарқатты.

«Біз үшін ең маңыздысы – әр азаматтың Тәуелсіздік игілігін сезіне алуы. Оның басты көрінісі – елдегі бейбіт өмір, қоғам­­дағы тұрақтылық пен тыныштық. Сон­дай-ақ халықтың тұрмыс сапасының жақ­са­руы және жастардың болашаққа нық се­німмен қарауы. Барлық бастамамыз осы­ған бағытталуда. Біз тұғыры мығым ел болу жолында кедергілерді еңсеріп, қиын­дық­тарды жеңіп келеміз. Мұның бәріне бе­рекелі бірлік пен еселі еңбек арқылы жеттік. Еліміз Тәуелсіздік жылнамасының төртінші онжылдығына қадам басқалы тұр. Бұл кезеңнің оңай болмайтыны қазірдің өзін­де айқын байқалуда. Сондықтан кез келген сын-қатерге дайын болуға тиіспіз. Тынымсыз ізденіп, ұдайы алға ұмтылуымыз қажет» деген Президент өзінің Жолдауында ең бас­тысы қазіргі пандемияның әсерінен кен­желеген кей істерді алға жылжыту ке­рек­тігін атап өтті. Соның салдарынан ке­шеуілдеген және ел экономикасына кері әсерін тигізеді-ау деген жұмыстарды айтып, пандемиядан кейінгі дамудың бағыт-бағдарын көрсетті.

Иә, расымен сонау тәуелсіздік алған жылдардан бері Тұңғыш Президентіміз қа­зақ­стандықтар үшін, жас ұрпақтың бола­ша­ғы үшін талай сыннан өтіп, көреген сая­сатының арқасында егемендіктің белгісін берік қалады. Жыл сайын дәстүрлі түрде Қазақстан халқына арнаған Жолдауларында еліміздің ертеңі үшін өзекті, ойлы шешімдер қабылдап, халықты қуатты сөзімен қанат­тандырып отырды. Әсіресе жаһандық дәуір­дің сын-қатерлеріне төтеп берудің те­ті­гін, Қазақстанның дағдарысқа қарсы мүмкіндіктерін кеңінен талдап көрсетті.

Тұңғыш Президент өз сөзінде дағдарысқа қарсы мүмкіндіктерді қалыптастыруда кез келген мемлекет ең алдымен экономикасын дамытуға тиісті екенін, яғни қаржы, металдар мен азық-түлік және басқа да рыноктар тұрақсыз болғандықтан, экспорттық өнімдерге сұра­ныс­тың төмендеуі әбден мүмкін екенін жеткізген еді. Осының салдарынан әлем экономикасының дамуы күрт баяулап, ірі державалық мемлекеттер арасында сенімсіздіктің пайда болуына әке­летінін де айтқан болатын. Қасым-Жомарт Тоқаев «Халық бірлігі және жүйелі реформалар – ел өркендеуінің берік негізі» атты биылғы Жолдауында дәл осы ел экономикасын көтерудегі тиімді тетіктерді атап өтіп, орталық Азиядағы экономикасы ең ауқымды ел саналатын Қазақстан қазір пан­демияның зардабын сезініп жатқанын мәлімдеді.

«Біздегі қаржылық орнықтылықтың қоры соншалықты шексіз емес. Бюджеттің кірісін арттыру үшін шаралар қабылдау қажет екені сөзсіз. Бірінші кезекте, мемлекеттік шығыстардың ауқымын және оның тиімді жұмсалуын бақылауда ұстау керек. Ұлттық қордың активтерін қалпына келтіру үшін бюджет ережесін енгізуді тездеткен жөн. Бұған қажетті заңнамалық өзгерістер осы жылдың соңына дейін қабылдануға тиіс. Жалпы, елімізге мемлекет қаржысын, атап айтқанда, мемлекеттік қарызды, бюджет саясатын және Ұлттық қорды басқарудың ережелер жинағы қажет. Үкімет пен Ұлттық банктен жыл соңына дейін Мемлекет қар­жысын басқару тұжырымдамасын әзірлеуді сұраймын” деді Мемлекет басшысы.

Мұнан бөлек экономиканы әр­та­рап­тан­дыру, өндірілетін тауарлардың түрін кө­бейтіп, экспорт географиясын кеңей­ту жө­ніндегі жұмысты жалғастыру керектігін қуат­таған ол 2020 жылдың қорытындысы бойынша, индустрияландыру жүзеге асыры­лып жатқан 10 жыл ішінде тұңғыш рет өң­деу өнеркәсібінің экономиканы дамытуға қос­қан үлесі тау-кен өндірісі саласынан асып түскенін хабарлады.

Ел Президентінің саяси құжатында атап көрсетілген «Пандемиядан кейінгі кезең­де­­гі экономикалық даму» бөліміндегі өзек­ті мәселелерді дер кезінде қолға алып, іске асыру келесі кезекте тұрған жұ­мыс. Президент айтпақшы, экономика әлсі­ре­мес үшін пандемия кезінде мемлекет аза­мат­­тарға және кәсіпкерлерге ауқымды әрі же­дел қолдау көрсеткеніндей, «Қарапайым заттар экономикасы» секілді тиімді бағдар­ламаларды іске қосқан жөн. Бұл өз кезегінде халықтың тұрмыстық жағдайының төмендеп не болмаса елдегі жұмыссыздар санының көбейіп кетуінің алдын алады. Әркім өзінше жұмыс жасап, өз-өзін жұмыспен қамтуды, табысын арттыратын мүмкіндіктерді тиімді пайдалануды үйренеді.

Дәстүрлі Жолдаудың «Еңбек нарығында тиімді экожүйе қалыптастыру» мәселелері қамтылған бесінші бөлімінде ең­бек нары­ғындағы соңғы өзгерістерге шолу жа­салған. «Пандемия еңбек нарығын едәуір өзгертті. Бұл – ең алдымен, қашықтан жұ­мыс істеу тәсілінің қарқынды дамуы. Көп­теген жаңа кәсіптер пайда болған, үде­ріс­тердің көпшілігі автоматтандырылып, цифр­­ландырылып жат­қан қазіргі кезде бұл үрдіс тың серпінге ие болуда. Осындай жағ­дайда мамандықты жиі өзгерте білу және жаңа кәсіптерді игере алу арқылы ғана әр­кімнің бәсекеге қабілетті болуын қам­та­ма­сыз ете аламыз» деген Қасым-Жомарт Тоқаев бұл ретте «Кәсіби бі­лік­тіліктер туралы» заң қажет деп, бұл құ­жат біліктілікті тану мәселесін реттеп, жұ­мыс­шыларды өзінің қарым-қабілетін жетіл­ді­руге ынталандыруы керек екенін де атап өтті.

Тәуелсіздік алғалы бері біздің ауданда да жүйелі жұмыстар атқарылуда. Жаңғырудың алғашқы баспалдағы саналатын латын әліпбиіне көшу бастамасы да аудан халқын бейжай қалдырған емес. Сонымен бірге салт-дәстүрді халық жадында қайта жаң­ғыртып, бүгінгі ұрпақтың бойына сіңіру мақсатында да айтулы шаралар ұйым­дастырылуда. Мә­селен, осыған дейін ау­данда «Туған жерге тағзым» жалпы респуб­ликалық ак­циясы, «Жастар – туған жерге» атты ау­дан­дық жастар форумы секілді тари­хи оқи­ғалар көптеп орын алды. Биыл да аудан орталығында жарқын істер жарасымды жалғасын тапты. Соңғы жылдары елімізде құрылыс саласы да қарқынды дамуда. Халық салаға серпін беріп отырған көптеген мемлекеттік бағдарламалардың жемісін кө­­руде. Қаншама қазақстандық жайлы қо­ныс, жаңа баспанаға ие болуда. Міне, бұл да мемлекеттің халық үшін жасаған тиімді бастамасы. Жалпы мұның барлығы халықтың әлеуметтік деңгейін көтеретін бірден-бір бастама деуге болады.

Ең бастысы Ел Президентінің «Біздің ба­ғытымыз белгілі, мақсатымыз айқын. Сол мақсатқа жету үшін не істеу қажеттігін жақсы білеміз. Нақты жоспар жасап, соны жүзеге асырып жатырмыз. Біз қолға алған игі бас­та­маның бәрін соңына дейін жеткіземіз» деген сөзі Қазақстанның болашағынан үміт күтетін әрбір адамды жігерлендіреріне сенеміз.