Аламесек халқы заман талабына сай дәрігерлік емхана болса дейді
Аудан басшысы Асқарбек Есжановтың бүгінгі жұмыс сапары Аламесек ауылдық округінде жалғасын тапты. Алдымен ауылдағы дәрігерлік емханаға аялдаған Асқарбек Темірбекұлы медициналық нысан жұмысымен танысты.Ауылдық дәрігерлік емхана меңгерушісі Темір Өмірбевтың сөзінше, мұнда көбіне халық жүрек қан тамыры және бүйрек ауруларымен келеді екен. Бұл елді мекенде де маусымында тұмау өршитін көрінеді. Медициналық нысанда 21 маман жұмыс жасайды. 5 орындық күндізгі стационар бөлмесі де бар. Алайда ғимарат ескі.
Сапар барысында өңір басшысы мұндағы медициналық қызметке жүгінуге келген жергілікті тұрғындармен де кездесті. Олардың да талап тілегі сол, ауылда заман талабына сай дәрігерлік емхана ғимараты болса дейді. Нысанның барлық бөлмесін аралап танысқан Асқарбек Темірбекұлы Есет батырлықтардың бұл ұсынысының орынды екенін тілге тиек етіп, алдағы уақытта мәселенің оң шешімін табуына мейлінше жұмыс жасалатынын жеткізді.
Мұнан кейін аудан әкімі ауылдағы №124 орта мектебіне аялдады. Екінші бөлігі күрделі жөндеуден өткен білім ошағы жұмысымен танысқан Асқарбек Есжанов мейлінше білім сапасына басымдық беру қажеттігін мектеп ұжымының назарына салды.
– Мемлекет қомақты қаражат бөліп, үлкен қолдау білдіретін саланың бірі – білім. Соның жемісін аламесектік ағайындар да көріп отыр. Жуырда күрделі жөндеуден өткен бұл ғимаратта балалардың білім алуына барлық жағдай жасалыпты. Енді мейлінше білім сапасына басымдық беруіміз керек. Себебі елдің келешек тұтқасы – осындай өскелең ұрпақтар. Бәсекеге қабілетті ұрпақ қалыптастыруға мемлекет бар жағдайды жасап отыр. енді осыны тиімді пайдалану керек. Ол үшін оқушыларға берілетін білім сапасына басымдық берген абзал, – деді өңір басшысы.Асқарбек Темірбекұлының бұл сөзіне алып-қосарымыз жоқ. Расында мемлекет оқушылардың білім алуына бар жағдайды жасап қойды. Оған дәлелді алыстан іздеудің де қажеті жоқ. Бір ғана Есет батыр ауылындағы білім ошағының күрделі жөндеуіне қырауар қаражат бөлінді. Жемісін тұтас ауыл көріп отыр. Қазір ауыл балалары заман талабына сай жарақталған жаңа нысанда еш кедергісіз білім алуда.
400-ге жуық оқуші білім алатын бұл нысан 1984 жылы салынған. Содан бері ауыл мектебінің ғимаратына ешқандай жөндеу жұмыстары жүргізілмеген. Білім ошағының 200 орындық екінші бөлігі жуырда күрделі жөндеуден өтіп, пайдалануға берілді. Жоба құны 367 млн 925 мың 266 теңгені құрайды. Тиісті қаражатқа ауыл мектебінің есік-терезелері, едені мен шатыры ауыстырылды. Сондай-ақ ішкі қабырғалары сыланып, сыртқы беті темірлі сайдингтермен қапталған. Кәріз, ауыз су және жылу жүйесі жаңартылып, электр жүйлері, өрт дабыл қондырғылары ауыстырылып, ғимараттың сыртқы беті абаттандырылған. Біз сөзбен айтқанда жаңа нысанда балалардың білім алуына еш кедергі жоқ.Мұнан кейін аудан әкімі ауылдық мәдениет үйінде жергілікті халықпен, ардагерлермен, шаруашылық басшыларымен кездесіп, пікір алмасты. Алдымен жүздесудің негізгі мақсатына тоқталған өңір басшысы көп созбай кезекті жергілікті тұрғындарға берді.
Алдымен сөз алған ауыл ардагері Бұғыбай Сыздықов аудан басшысының алдағы жұмысына сәттілік тілеп, өңірде бірқатар мәселелер шешімін тауып жатқанын жеткізді. Ал тағы бір ауыл ақсақалы Қожамұрат Лепесбаев аудан басшысының өңірді өркендетуге бағыталған әрбір жобасының көңілінен шығатынын тілге тиек етсе, Мұқан Пірманов жергілікті шаруашылықтар соңғы жылдары ауылды абаттандыруға үлкен үлес қосып, тың бастамаларды жүзеге асырып жатқанын жеткізді.Асқарбек Темірбекұлы ауданды дамытудың 3 жылдық жоспары жасалып жатқанын аламесектіктерге жеткізіп, ол жобадан ауылдық елді мекендерді дамыту да тыс қалмайтынын тілге тиек етті.
Мұнан кейін аудан әкімі ауылды абаттандыруға бағытталған шаруашылық төрағаларының жобаларымен танысты. Олардың бірі ауылдан арнайы аллея салуды көздесе, енді бірі жанармай құю бекетін ашуды жоспарлап отыр. Бұл жобалардың ауылдың әлеуетін арттыруда, көркеюіне үлкен сеп боларын жеткізген Асқарбек Есжанов оны жүзеге асыруда ешқандай кедергі болмауын қамтамасыз етуді ауыл әкімінің назарына салды.Кенжетай ҚАЙРАҚБАЕВ
