Еңбекте 3 көше асфальтталады

Аудан әкімі Асқарбек Есжановтың ауылдық елді мекендерге бүгінгі жұмыс сапары Еңбек ауылдық округінде қорытындыланды. Алдымен ауылдағы Мардан Байділдаев атындағы білім ошағына аялдаған өңір басшысы №232 орта мектеп ішіндегі «М.Байділдаев» атындағы музей жұмысымен танысты. Мұнда халық әдебиеті үлгілерін жинауда һәм зерттеуде қажырлы еңбек еткен атпал азаматтың жұмыс барысында пайдаланған құралдары, кітаптар қоры, елімізге еңбегі сіңген қайраткерлермен түскен суреттері жинақталған.

Асқарбек Темірбекұлы мұнан кейін 11 сынып оқушыларымен кездесіп, алдағы ұлттық бірыңғай тестілеуде жоғары балл жинау үшін үлкен ізденіс қажеттігін қаперге салды, ағалық ақылын айтып, үлкен азамат болып, еліне еңбек сіңіруіне ақжол тіледі.
2016 жылы күрделі жөндеуден өткен ауыл мектебінде қазіргі таңда 309 оқушы білім алуда. Оның 25-і биыл мектеп бітіреді. Былтыр білім ошағынан түлеп ұшқан 26 оқушының барлығы жоғары және арнаулы оқу орындарына түскен. Биыл да ауылдағы ұлағатты ұстаздар түлектерге үлкен сенім артып отыр. Жыл басында «Қызылорда» телеарнасы мен Қорқыт ата атындағы университет бірігіп, интелектуалды сайыс ұйымдастырған болатын. Онда балалар түрлі тақырыпта өз ойларын ортаға салып, пікір алмасады. Аталған сайыста топ жарған Еңбек ауылдық округіндегі №232 меткептің 11 сынып оқушысы Айсұлтан Төлеутай университет ректорының грантына ие болды.
Еңбектегі аудан басшысының жұмыс сапары ауылдағы шағын маркетте жалғасты. Кәсіпорын жұмысына қаныққан өңір басшысы мейлінше бағаны негізсіз өсіруге жол бермеу қажеттігін қаперге салды. «Еңбек-Жер» ЖШС төрағасы Шакизатхан Ысқақовтың ауылды абаттандыруға, елді мекеннің еңсесін тіктеуге бағытталған жобаларына жоғары баға берген аудан әкімі мұнан кейін ауылдық мәдениет үйінде жергілікті халықпен жүздесті.

Еңбек – ауызбіршілікті ту етіп, ымырамен іс қылудың арқасында өрісі кеңейген елді мекен. Оны ешкім жоққа шығара алмайды. Шакизатхан ағамыз бас болып, ауыл ардагерлерінің батасымен ауылда өрісті жобаларды жүзеге асырып келеді. Тіпті бір жылда 72 млн теңгені сабантойда әріптестеріне үлестірді. Осыдан-ақ ауылда адал еңбектің лайықты бағаланатынын аңғаруға болады.

Елді мекен халқы, ардагерлер аудан басшысының жұмысына сәттілік тілеп, жол мәселесін қаперіне салды. Расында ауылда ішкі көшелер сапасының сын көтермейтініне біз де көз жеткіздік. Алайда бұл аудан басшысын да алаңдатады екен. Бұған қатысты өзінің де жақсы жаңалығын жеткізді. Яғни биыл Еңбекте Мүсірәлі баба, Сырбай ата және Ғ.Мұратбаев көшесіне жөндеу жұмыстары жүргізіледі. Аудан басшысының бұл жаңалығына қуанған ауыл халқы алғысын білдіріп, ауылдық ардагерлер кеңесінің төрағасы Мархабай Балханов Асқарбек Темірбекұлына батасын берді.
Мұнан кейін Асқарбек Темірбекұлы жексенбіде өткен сайлау қорытындысымен Еңбек ауылдық округінің әкімі болған Қайрулла Қалдановтың жұмысына сәттілік тілеп, аудан экономикасында тұрақты өсім қалыптастыруға, Еңбектің еңсесін тіктеуде қажырлы еңбек ететіне сенім білдірді.

Кенжетай ҚАЙРАҚБАЕВ