Өңірге Астанадан мәжілісмен келеді дегенді естіген көпшілік таң азанымен көшбасшы партияның аудандық филиалына ағылды. Бірі жеке мәселесін алға тартып баспана сұраса, енді бірі жастарға арналған бағдарлама тетігін одан әрі кеңейту қажеттігін айтты. Сондай-ақ, жеке қабылдау барысында ветеринария са­ла­сының жай-күйі, "Дипломмен ауылға" бағ­дарламасы және кейбір заңнамалық актілердің бір-біріне қарама-қайшылығы да назардан тыс қалмады. Халық қа­лау­лысы осы айтылған мәселелерді рес­пу­бли­ка деңгейінде көтеріп, оң ше­ші­мін табуға ықпал ететінін жеткізді.

ТӘРТІП САҚШЫЛАРЫМЕН КЕЗДЕСТІ

Аудан әкімі Қайратбек Сәрсенбаев пен­ мәжілісмен Кәрібай Иманжанұлы ау­дан­дық полиция бөлімінің зәулім ғима­ратын аралап, жаңа форматқа негізделген қызмет көрсету жұмысымен танысты.

Мемлекет басшысы жариялаған "Қазақстандықтардың әл-ауқатының өсуі: табыс пен тұрмыс сапасын арттыру" атты Жолдауда құқық қорғау органдарының жұмысына терең және сапалы өзгеріс қажеттігін атап өткен болатын. Бұл орайда аталған салада халықпен жұмыс істеудің жаңа заманауи форматтарын енгізіп, қалалық және аудандық ішкі істер органдары жанынан Халыққа қызмет көрсету орталықтарының қағидаты бойынша азаматтарды қабылдау үшін қолайлы жағдай жасауды талап етті. Осыған орай, аудан ор­талығында бой көтерген бұл ғи­ма­рат­тың материалдық-техникалық базасы то­­­лығымен жаңарып, халыққа ыңғайлы фор­матта қызмет көрсету стандартына көш­кен.

Облыстық бюджет есебінен бой кө­тер­ген үш қабатты ғимараттың жалпы ауданы 1681,70 шаршы метрді құрайды. Сондай-ақ, заман талабына сай жабдықталған жа­ңа нысанда әкімшілік қамауға алын­ған­дарды ұстау изоляторы бар. Аудандық полиция бөлімінің басшысы Нұрлан Ағаділовтің айтуынша қылмыстың алдын алып, қоғамдық тәртіпті сақтауда ғи­мараттың материалдық, техникалық мүм­кіндігі мол. Соның бір дәлелі өткен жыл­дың осы кезеңімен салыстырғанда, құқық бұзушылық, бұзақылық саны азай­ған және орын алған қылмыстың ашылу көрсеткіші артқан. Нәтижесінде, жыл қорытындысымен аудандар арасында біздің өңірдегі полиция бөлімінің жұмысы жақсы көрсеткішке ие болып, екінші орын­ға жайғасты.

Айта кету керек, бұл жаңа ғимарат аймақтағы типтік жобада салынып, заман талабына сай жабдықталған санаулы нысандардың қатарында. Сонымен бірге, мұнда Қармақшы, Жалағаш, Сырдария аудандарына ортақ уақытша ұстау изоляторы орналасқан.

Халық қалаулысы жаңа ғимаратты аралап көрген соң, аудандық полиция­ қыз­меткерлерімен кездесті. Онда де­пу­таттардың ел жағдайымен етене таны­су­дағы мақсаты – Елбасы Жолдауы мен мем­лекеттік бағдарламалардың іске асыру бойынша елді мекен тұрғындары, ең­бек ұжымдарымен кездесу өткізіп, жо­ға­­ры деңгейде шешілетін күрмеуі қиын мәсе­лелерді анықтау екені айтылды.

– Өңір-өңірлерді аралап, мемлекеттік бағ­дарламалардың орындалуын бақылап келеміз. Тұрғындардың ұсыныс-пікірлерін тыңдап, оны парламент қабырғасында көтеруге дайынбыз. Жалпы, Сыр Елі – бірлігі мен ынтымағы жарасқан өлке. Мұнда ел болып еңсерген жұмыстар да аз емес. Мәселен, қазір солтүстік өңірлерде демографиялық жағдай қиын, ол жақтағы ауылдарда халық саны аз. Сондықтан, халық көп шоғырланған аймақтардың тұрғындары сол жаққа қоныс аударып жатыр. Жұмысқа орналастыру, кәсіп ашу, баспанамен қамтамасыз ету мәселелері қарастырылған. Жұмыссыз жандар болса, теріскейге көшіріп, үй-жаймен қамтамасыз етуге дайынбыз. Ел аралап жүргесін осы мәселені де көпшіліктің назарына тағы бір ұсынғым келеді. Ал, аудандық тәртіп сақшыларының жұмысына келер болсам, материалдық-техникалық базасы мықты мұндай зәулім ғимараттың осы өңірде бой көтергені полиция қызметін одан әрі жетілдіруге мүмкіндік береді. Ең бастысы, сіздер халықтың қорғанысыздар. Жұмыстарыңызға табыс тілеймін, – деді ҚР Парламентінің Мәжіліс депутаты Кәрібай Иманжанұлы.

Қазір, ауданда полиция қызметі ма­манына тапшылық жоқ. Су жаңа кө­ліктер әлсін-әлсін келіп жатыр, бө­лім­нің материалдық-техникалық ­базасы да жаңа. Бірақ, әттеген-ай дейтін бір мәселе бар. Ол – ауыл инспекторла­рына берілетін баспана. Мәселен, ауыл­­дағы полиция инспекторлары туған-туыстарын жағалап, жалдамалы пә­­терге тұруға мәжбүр. Сесебі, елді мекен­дерде оларға арнайы қызметтік бас­пана қарастырылмаған. Осының салдарынан ауылға қызмет ауыстырған полиция маманы ол жақта ұзақ уақыт тұрақтамайды екен. Осылай деген өңір басшысы Қайратбек Сәрсенбаев депутатқа өз ұсынысын жеткізді. Сонымен бірге, "Нұр Отан" партиясы аудандық филиалы төрағасының бірінші орынбасары Қаншагүл Мұстафаева аудандағы жол полиция қызметінің штат санын айтып, оны көбейту керектігін назарға салды. Ал, халық қалаулысы бұл мәселелерді де зерттеп, тиісті министрлікке ұсынатын болды.

ӨҢІРДЕГІ ӨМІРШЕҢ ЖОБАЛАРҒА СҮЙСІНДІ

Соңғы жылдары өңірде кәсіпкерлік аясы кеңейіп келеді. Соның бірі – «Сер­пін»­ индустриалды өндіріс айма­ғын­да ор­наласқан «Өркен Әлем» жауап­кер­ші­лі­гі шектеулі серіктестігінің «Арнайы киім тігу шеберханасы». Мұнда қазір 33 адам жұмыс жасайды.

Жалпы, тігін тігіп, кесте тоқып, ою салу – халқымыздың жанына жақын кә­сіп. Сондықтан болар, мұндағы қолы­ епті қыз-жігіттердің қимылы да ширақ. Тігін­шілердің басым көпшілігі «Нә­ти­же­лі жұмыспен қамту және жаппай кәсіп­кер­лік­ті дамыту» бағдарламасының бі­рінші бағыты бойынша үш ай мерзімде оқып, кәсіби даярлықтан өтіпті.

Жобаның жалпы құны 38,2 млн тең­гені құрайды. Оның ішінде жаңа стан­дартқа сай тігін машиналары Ресейден әкелінген. Өнім дайындауға қажетті тауарлар да сол жақтан алынып отыр. Сондықтан мұндағы тігіншілер қолынан өткен бұйымдардың сапасы да мықты. Ше­берхана меңгерушісі Аққолқан Бос­шае­ваның айтуынша, осы уақытқа дейін жұ­­мыс­сыз отырған қыз-келіншектер бұл кәсіпке ерекше ынтамен кірісіп кеткен. Сондай-ақ, олар мемлекеттік тапсы­рыстарды орындаумен бірге, аудан­ тұр­­ғындарына да қызмет көрсетеді. Киім-кешектер, құрақ көрпешелер, төсек жаб­дық­тарын тігеді.

– Мемлекеттің қолдауымен кәсіби даяр­лықтан өтіп, жұмыс жасап келеміз. Ең­бекақымыз да уақытылы. Ең бастысы, жұмысымыз көңілімізден шығады. Кәсіп аясын кеңейтуге қолымыздан келгенше өз үлесімізді қосамыз, – дейді тігіншілер.

Мәжіліс депутаты Кәрібай Мұсырман қорғаныс, өрт сөндіру, полицейлерге арналған түрлі киімдерді көріп, мұндай ау­қымды жұмыстың ауданда атқарылып жатқанына өз ризашылығын білдірді. Жергілікті шеберлердің қолынан шыққан киімдердің ішінде отқа жанбайтын, ыстық-суыққа төзімді және суық қаруды дәлдеп атсаң да оқ өтпейтін матадан тігілген киімдер де бар.

Халық қалаулысы түс ауа Таң ауылына аялдады. Алдымен, «Таң LTD» ЖШС-нің «Дихан ата» күріш ақтау зауытында болып, цех жұмысымен танысты. Бұл күріш ақтау цехының жоба құны 150 млн теңгені құрайды. Мұнда тәулігіне 100 тонна күріш салысын ақтайды. Сондай-ақ, 10-нан астам адамды тұрақты жұмыспен қамтыған цехта ауыл тұрғындарына арзандатылған бағада мал азықтары да дайындалады екен.

Шаруашылық диқандары осы күнге дейін күрішті сыртқа апарып өңдеген болса, биылдан бастап осында өнімді дайындап жатыр. Жаңа технологиялармен жабдықталған цех жұмысымен және күріш ақтау қондырғыларымен таныстырған мамандар өңделген өнімнің сапасы жоғары екенін айтты. Мәжілісмен осындай игілікті істі жүзеге асырып, бірнеше ауыл азаматын жұмыспен қамтып отырған «Таң LTD» жауапкершілігі шектеулі серіктестігіне алғысын білдірді.

Мұнан соң, меймандар осы ауыл­дағы мемлекеттік және жекеменшік әріп­тестік бағдарламасы негізінде са­лынған 90 орындық «Таң бөбегі» бала­бақша жұмысымен танысты. Айта кейік, бұл нысан бұған дейін апатты жағ­дай­да тұрған болатын. Мұны күрделі жөн­деуден өткізген «Таң LTD» ЖШС төрағасы Имамзада Шағыртаев ауылдан жаңа балабақша ашуға қамқорлық танытты. Жаңа үлгідегі құрылғылармен жабдықталған балабақшада қазір 25 қызметкер тұрақты жұмыспен қамтылған.

Ауыл тұрғындары бір ғана серіктестік бүтін бір ауылды гүлдендіріп отырғанына мақтанады. Жалпы, «Таң ЛТД» ЖШС шаруашылық ісін дөңгелетіп қана қоймай, туған жерді көркейтуге атсалысып келеді. Ауылды дамыту бағытында атқарып жатқан мұндай ауқымды жұмыстарға халық қалаулысы да дән риза.

АСҚАҚ АРМАНҒА –

АУЫЛ ЖАСТАРЫМЕН

Сол күні халық қалаулысы Кәрібай Мұсырман Еңбек ауылына барып, әр салада еңбек етіп жүрген белсенді жастармен кездесті.

Ауылдық мәдениет үйінде өт­кен "Ас­қақ арманға – ауыл жастары­мен" ат­ты кез­десу кешіне жас мұға­лім­дер, дәрі­герлер, кәсіпкерлер, ауыл ша­руа­шы­­лығы, жұмыспен қамту, төтенше жағ­дай­лар, ішкі істер, мәдениет, экономика саласының жас мамандары қатысты. Биылғы жыл "Жастар жылы" болып жариялануына орай жастар кәсіп ашуға мемлекет тарапынан біраз жеңілдік қарастырылады деген үмітте. Осылай деген өңір белсенділері халық қа­лау­лы­сына өз ұсыныстарын айтып, ой-пікір­лерін ортаға салды. Олардың арасында Астанадағы Жастар жылының ашылу сал­танатына қатысып келген Алтынбек Исабаев та болды.

– Мен Еңбек ауылындағы "Еңбек Жер" ЖШС-да бас агроном кызметін ат­қа­ра­мын. Жастар жылының ашылу салтанатында Елбасы ауыл шаруа­шы­лығына айрықша тоқталып өтті. Яғни, ауыл жастарына мемлекет тарапы­­нан жан-жақты қолдау көрсетілуде. Осы жиында егіншілікпен айналысатын шаруашылықтарды толық автоматтан­дыру жүйесі қолға алынғаны да айтылды. Менің өз салама қатысты ай­тылған бұл жаңалық әрі қарай жұ­мысқа деген жігерімді еселей түсті. Жас­тарға арналған "Дипломмен ауыл­ға" бағдарламасының уақыты ұзартылғаны мені қуанады, – деді ол.

Сондай-ақ, жас агроном осы бағ­дарламаға ауыл ша­руа­шы­лы­ғы мамандары да кі­ріс­ті­ріл­се екен деген ұсы­ны­сын жет­кіз­ді.

Ал, өткен жылы "Жас прожект" жобасы аясында кәсіп ашқан жастар бастаған ісін одан әрі дамытуға қаржы қол байлау болып отырғанын жасырмады. Мәселен, тиыннан тиын құрап, енді ғана алға жылжып келе жатқан жас кәсіпкерлерге банк несие бермейді. Себебі, олардың кепілге қояр мүлкі жоқ. Осы мәселені алға тартқан көпшілік тым болмаса "Жас­тар жылында" іскер жастарға кепілсіз несие берілсе деген өтініштерін жеткізді.

– Қазіргі таңда "Жас кәсіпкер" бағдарламасы әзірленіп жа­тыр және осы айтылған ұсыныстарды сол жобаға ұсынуға тырысамын. Өздеріңізге белгілі екінші деңгейлі банктердің саясаты, кепілдік мәселесі қазіргі таңда қиындық тудырып отыр. Бұл мәселе де өз шешімін табатын болады, – деді Жастардың ұсынысын тыңдаған Кәрібай Иманжанұлы.

Халық қалаулысымен еркін әңгімелесіп, өз ойларын ортаға салған жас мамандар "Қазақстан жастарының сайтын" ашу керектігін де назарға салды. Сол сайт арқылы жастар біраз ақпаратқа қол жеткізгісі келеді екен.

Мәдениет үйінен әрі асып, орталық көше бойымен жаяу жүріп өткен меймандар сән-салтанаты жарасқан, сәулеті келіскен, ауылдың ажарына сүйсініп, жаңадан ашылған сауда үйі мен мейрамхананы аралап шықты. Айта кету керек, аталған кәсіпкерлік нысандар ауыл азаматы, «Еңбек Жер» ЖШС директоры Шакизатхан Искаковтың жеке қаражаты есе­бінен салынды. Бүгінгі күні ауыл ор­талығынан ашылған 200 орындық «Асылзат» мейрамханасы мен шағын мар­кет кәсіпкерлік нысандары ел игі­лігіне пайдаланылып келеді. Қазір мұн­да 10-ға жуық адам тұрақты жұ­мыс­пен қамтылған.